Mae’r Etholiadau Sabothol yn agosáu… a dyma’r amser i ddechrau meddwl am sefyll.

Bydd yr Etholiadau Sabothol yn dechrau ym mis Chwefror 2012. Bydd enwebiadau ar gyfer ymgeiswyr yn agor ar 10 Chwefror ac fe gewch y cyfle i ethol eich cynrychiolwyr myfyrwyr ym mis Mawrth.

Yn gyntaf oll… beth yw ‘swyddog sabothol’?

Mae swyddogion sabothol yn fyfyrwyr a etholir i redeg eich undeb myfyrwyr am flwyddyn (Gorffennaf – Gorffennaf) er mwyn sicrhau bod yr UM yn cael ei redeg yn unol â dymuniadau’r myfyrwyr yma ym Mangor.  Mae’r rhain yn swyddi cyflogedig am un flwyddyn – dwy flynedd yw’r cyfnod hiraf y gall unrhyw un fod mewn swydd.  Bob blwyddyn, yn unol â’r gyfraith, rhaid i Undeb y Myfyrwyr drefnu pleidlais ymhlith ei aelodaeth i ddewis y swyddogion sabothol ar gyfer y flwyddyn ganlynol.

Gall unrhyw un sydd ar hyn o bryd yn fyfyriwr cofrestredig ym Mangor gynnig eu hunain fel ymgeisydd yn yr etholiadau.

Ie, chi. Gallech chi sefyll yn yr etholiadau.  Meddyliwch am y peth… Chi.

A siarad ar ran 10,000 o fyfyrwyr.

Gweithredu ar y materion hynny sydd o bwys iddyn nhw ac sy’n peri pryder iddynt, yn amrywio o sylwadau academaidd ar draethawd, trefnu chwaraeon, gweithgareddau elusennol a rhai wedi’u harwain gan fyfyrwyr, a hyd yn oed trafod y gost o fynd i’r brifysgol yn y lle cyntaf.

Pa mor anhygoel fyddai hynny?

Pa swyddi sydd ar gael?

Y peth nesaf gwych am hyn yw’r ffaith fod yna bedair swydd wahanol ar gael, pob un ohonynt yn apelio at wahanol ddiddordebau a sgiliau:

Llywydd:

• Cydlynydd y tîm sabothol; yn siarad ar ran y corff myfyrwyr i’r Brifysgol a’r gymuned leol; yn arwain ymgyrchoedd yn ymwneud â chyllido addysg, mynediad i’r brifysgol a chyfleusterau academaidd Bangor; y prif swyddog sy’n gyfrifol dros gyllideb UM.

Is-Lywydd, Addysg a Lles:

• Yn gweithio gyda’r Ganolfan Cynghori Myfyrwyr i helpu datrys problemau academaidd, lles a chymdeithasol myfyrwyr; yn arwain ymgyrchoedd sy’n ymwneud â thai ac iechyd myfyrwyr; yn cydlynu’r rhaglen cynrychiolwyr cwrs ar ran yr undeb a’r brifysgol.

Is-Lywydd, Chwaraeon a Byw’n Iach

• Yn rhedeg yr Undeb Athletau ac yn gyswllt allweddol i’r clybiau chwaraeon; yn cydlynu â mudiad Chwaraeon Prifysgolion a Cholegau Prydain (BUCS); yn arwain ar weinyddu, cynllunio a threfnu pob gweithgaredd chwaraeon boed yn gystadleuol neu’n anghystadleuol; yn cynnal digwyddiadau ac ymgyrchoedd gyda’r nod o annog myfyrwyr i fyw bywydau iachach a mwy heini.

Is-Lywydd, Cymdeithasau a’r Gymuned

• Yn cydlynu gweinyddiad, cynlluniau a threfniadau holl gymdeithasau’r undeb; yn annog cyfranogiad myfyrwyr mewn gweithgareddau allgyrsiol; yn cynorthwyo gyda chreu cymdeithasau newydd; yn rhedeg digwyddiadau ac ymgyrchoedd gyda’r nod o integreiddio myfyrwyr a chymunedau lleol; yn cefnogi gwaith Gwirfoddoli Myfyrwyr Bangor; yn arwain prosiect cymunedol ‘Caru Bangor’.

Beth arall ddylaswn i wybod am fod yn Swyddog Sabothol?

Mae’r oriau’n hir ac mae’r gwaith yn amrywiol. Bydd disgwyl i chi fod yn eiriolwr ar ran hawliau myfyrwyr, yn arweinydd prosiectau, cynlluniwr digwyddiadau, cydlynydd tîm staff, yn gynrychiolydd safbwyntiau myfyrwyr, yn drefnydd llu o ddigwyddiadau, yn ymddiriedolwr elusen, yn ddeiliad  cyllideb ac yn llysgennad ar ran y corff myfyrwyr i’r Brifysgol a’r gymuned ehangach. 

(Mae hyd yn oed yn bosib bydd gennych chi amser am fywyd cymdeithasol, ond mae hynny’n annhebygol.)

Os ydy hynny’n swnio’n gryn dipyn… peidiwch â chael braw oherwydd bydd gennych dîm o staff i’ch helpu chi ac mae yna ddigonedd o gyfleoedd ar gael ar gyfer hyfforddiant a datblygiad.

Fel tîm, mae’r Swyddogion Sabothol yn gyfrifol dros yr Undeb gyfan, ac yn atebol iddo. Maent yn gwneud y penderfyniadau o ddydd i ddydd ynglŷn â phob lefel o weithgaredd yn eich undeb. Yn benodol, byddwch:

• Yn ymddiriedolwr Undeb y Myfyrwyr
• Yn gwasanaethu fel aelod o Fwrdd yr Ymddiriedolwyr
• Yn gyfrifol dros gyfeiriad yr Undeb o ddydd i ddydd
• Yn gweithio o fewn polisi Cydraddoldeb ac Amrywioldeb yr Undeb
• Yn datblygu a gweithredu cynllun o weithgareddau gyda gweddill yr Ymddiriedolwyr
• Yn  gwrando ar ac yn annog cyfraniad gan fyfyrwyr mewn agweddau o’ch gwaith
• Yn mynychu Fforymau Cymunedol Myfyrwyr a Phwyllgorau Craffu’n ôl y galw
• Yn aelod o amryw o Bwyllgorau’r Brifysgol gan gynrychioli barn myfyrwyr i’r Brifysgol
• Yn cynrychioli’r mudiad a’r myfyrwyr i fudiadau allanol eraill e.e. y Cyngor Lleol ac UCM

Wedi dweud hynny i gyd, mae bod yn swyddog sabothol yn ddifyr, yn greadigol ac yn brofiad gwych.  Mae hefyd yn gyfle i chi wneud cyfraniad i’ch cymuned myfyrwyr ac i greu rhywbeth a fydd yn parhau am flynyddoedd ar ôl i chi symud ymlaen o Fangor.

Mae swyddi sabothol yn swyddi cyflogedig, llawn-amser yn yr Undeb. Gall unrhyw fyfyriwr ym Mhrifysgol Bangor sefyll amdanynt, p’un ai eich bod yn fyfyriwr blwyddyn gyntaf, hanner ffordd drwy’r cwrs, neu yn eich blwyddyn olaf. Mae’r flwyddyn sabothol yn dechrau ddiwedd Mehefin / dechrau Gorffennaf 2012, felly bydd angen i chi gymryd blwyddyn i ffwrdd o’ch cwrs academaidd neu aros ym Mangor am flwyddyn ychwanegol ar ôl i chi orffen eich cwrs. Mae’r cyfle hwn ar gael i fyfyrwyr rhyngwladol ond efallai y bydd angen i chi gael cyngor ynghylch eich fisa cyn i chi roi eich enw ymlaen.

Meddyliwch am p’un ai y gallai hyn fod o ddiddordeb i chi, a oes gennych chi’r sgiliau, syniadau a chreadigrwydd i fod yr arweinydd myfyrwyr nesaf? ’Does dim rhaid i chi benderfynu heddiw gan mai ym mis Chwefror y bydd y broses etholiadau’n cychwyn, felly cadwch lygad am y cyhoeddusrwydd a bydd yr etholiad ei hun yn cael ei gynnal fis Mawrth. Cadwch lygad ar myfyrwyrbangor.com – bydd mwy o wybodaeth yn ymddangos wrth i ni agosáu at y cyfnod pleidleisio.

Meddyliwch am y peth; bydd blwyddyn nesaf yn flwyddyn gyffrous ac fe allech chi fod yn rhan fawr o hynny.

Am fwy o wybodaeth, dewch i Undeb y Myfyrwyr i gael sgwrs gyda’r swyddogion sabothol presennol, cadwch lygad am sesiynau gwybodaeth etholiad neu anfonwch e-bost at rhys.dart@undeb.bangor.ac.uk

Yn ychwanegol i’r pedair swydd a enwir uchod, caiff Llywydd Undeb Myfyrwyr Cymraeg Bangor (UMCB) ei ethol gan aelodau UMCB yn bumed aelod o’r tîm sabothol. Os yr hoffech chi sefyll yn yr etholiad hwnnw, neu’r hoffech chi wneud yn siŵr bod gennych chi bleidlais, mae’n rhaid i chi fod yn aelod o UMCB. Er mwyn  ymuno ag UMCB, anfonwch e-bost at y Llywydd presennol, Mair Rowlands: mair.rowlands@undeb.bangor.ac.uk