Cynrychiolwyr Cwrs – Cymryd Rhan

Beth yw cynrychiolydd cwrs?

Mae cynrychiolwyr cwrs yn fyfyrwyr sy’n cael eu hethol, gan eu cyfoedion, i gynrychioli safbwyntiau myfyrwyr ar eu cwrs mewn cyfarfodydd staff–myfyrwyr. Felly’n sylfaenol maent yno i weithredu fel cyfryngwyr rhwng staff a’r myfyrwyr a rhoi mwy o ymdeimlad o berchnogaeth o’u hadran a’r brifysgol i bawb!

Pam eu cael nhw?

Mae’n swnio ychydig yn ystrydebol ond mae’r cynrychiolwyr cwrs yn bodoli er mwyn i ni sicrhau fod democratiaeth yn cael ei weithredu – yn sylfaenol mae hyn yn golygu fod gan bawb y cyfle i gael dweud eu dweud a newid ansawdd dysgu ac addysgu o fewn eu cyrsiau yma ym Mangor. Mae cynrychiolwyr cwrs yno er mwyn sicrhau fod pawb yn cael eu cynrychioli ac yn cael mynegi eu barn ar lefel yr ysgol a’r coleg.

Pwy all fod yn gynrychiolydd cwrs?

Gall unrhyw fyfyriwr fod yn gynrychiolydd cwrs – dyna sy’n ddifyr. Nid yw unrhyw ots o ble ydych chi’n dod, eich oed, p’un ai eich bod yn fyfyriwr israddedig neu ôl-raddedig, nag unrhyw beth arall amdanoch – mae gan bawb y cyfle i fod yn gynrychiolydd cwrs oherwydd wedi’r cyfan pwy sy’n gwybod mwy am eich cwrs a’ch adran na chi? Er mwyn canfod sut i gymryd rhan dewiswch yr adran ‘Sut gallaf i fod yn gynrychiolydd cwrs? Ydi hi’n rhy hwyr?’.

Beth yn union mae cynrychiolydd cwrs yn ei wneud?

Mae cynrychiolydd cwrs yn cynnig barn gyson, wybodus ynghylch ansawdd dysgu ac addysgu ar eu cyrsiau ac ynghylch profiad myfyrwyr yn ei grynswth yma ym Mangor.

Maent yn gwneud hyn drwy:

• Gael ymateb (da a drwg) gan bobl eraill ar eu cwrs
• Gyfathrebu ymateb myfyrwyr i’r staff
• Fynychu a chymryd rhan agos mewn cyfarfodydd staff–myfyrwyr
• Weithio gyda chynrychiolwyr cwrs eraill i sicrhau dilyniant i faterion sy’n codi
• Adrodd gwybodaeth yn ôl o gyfarfodydd i fyfyrwyr
• Fynychu cyfarfodydd Fforwm a Chyngor Undeb y Myfyrwyr
• Gadw mewn cysylltiad gydag Undeb y Myfyrwyr er mwyn eu hysbysu am ddatblygiadau a derbyn eu cymorth a chefnogaeth
• Gyfeirio myfyrwyr at staff/swyddogion sabothol perthnasol os oes problem yn codi nad yw’n ymwneud â’r cwrs neu ei fod yn rhy fawr iddyn nhw ymdrin ag ef.

Faint o amser fydd angen i mi ei roi i fod yn gynrychiolydd cwrs?

I ddechrau, bydd yn rhaid i chi fynychu’r hyfforddiant cynrychiolwyr cwrs (os gallwch ddod) sy’n cael ei gynnal am ddwy awr yng nghanol y semester cyntaf ac a fydd yn cyflwyno’r holl wybodaeth y byddwch ei angen i fod yn gynrychiolydd cwrs rhagorol yn ogystal â bod yn gyfle i gwrdd â chynrychiolwyr cwrs o adrannau eraill. Ar ôl yr hyfforddiant bydd disgwyl i chi gyflwyno eich hun i’r myfyrwyr eraill a chloriannu eu barn yn rheolaidd. Hefyd fe fydd gofyn i chi fynychu cyfarfodydd cynrychiolwyr cwrs sy’n cael eu cynnal o leiaf unwaith y semester – mae’r rhain yn bwysig iawn i’w mynychu gan mai dyma’r cyfle i chi ddweud wrth eich adran beth maen nhw’n ei wneud yn dda a beth sydd angen iddynt wella arno. Heblaw am hyn gallwch dreulio gymaint neu gyn lleied o amser fel cynrychiolydd cwrs ag y byddwch yn ei ddewis!

Os byddwch eisiau ymroi mwy o amser at fod yn gynrychiolydd cwrs yna mae pob adran hefyd yn anfon un o’u cynrychiolwyr i fynychu Fforwm Cynrychiolwyr Cwrs Undeb y Myfyrwyr, sy’n cael ei gynnal ddwywaith y flwyddyn, a dyma’ch cyfle chi i ddweud wrth Undeb y Myfyrwyr a chynrychiolwyr cwrs eraill ynghylch arfer da a drwg o fewn eich ysgol/coleg.

A fyddaf i ar fy ennill?

Mae cynrychiolwyr cwrs yn wirfoddolwyr – er lles y mwyafrif – sy’n helpu i hysbysu eu hysgol a choleg ynghylch unrhyw broblemau a wynebir gan eu cyd-fyfyrwyr. Ond mae yna fwy i’r mater na’r teimlad cynnes hwnnw a ddaw o wirfoddoli – fe fyddwch hefyd yn cael y cyfle i gwrdd â thoreth o bobl newydd o’ch cwrs a gwneud ffrindiau gwych newydd.

Fe fyddwch hefyd yn ennill nifer helaeth o sgiliau trosglwyddadwy newydd o fod yn gynrychiolydd cwrs, gan gynnwys: siarad cyhoeddus, trafod telerau, arferion da ar gyfer cyfarfodydd, eiriolaeth, cyfathrebu gydag eraill, datrys problemau, rheoli amser – i enwi ond ychydig! Gellir rhoi’r holl sgiliau hyn ar eich CV.

Beth fydd y manteision i’r brifysgol ac i’m hadran?

Fel rhan o gyfundrefn sicrwydd ansawdd y Brifysgol, mae gofyn i’ch ysgol roi’r cyfle am adborth gan fyfyrwyr ac ym Mangor rydym yn gwneud hynny drwy’r gyfundrefn cynrychiolwyr cwrs. Mae’r Ysgol yn cael budd o adborth y cynrychiolwyr cwrs drwy allu clustnodi ac ymateb yn gynt i broblemau posib, yn ogystal â chanfod beth sy’n mynd yn dda o fewn cyrsiau – gan sicrhau fod ganddynt y wybodaeth maent ei angen i roi’r amgylchedd cwrs gorau posib i’w myfyrwyr.

Mae’r Brifysgol hefyd yn cael budd o gael cynrychiolwyr cwrs, neu ‘Leisiau Dysgwyr’, gan eu bod yn cael eu hasesu ar eu lefel o ymwneud â myfyrwyr gan yr Asiantaeth Sicrwydd Ansawdd, yn ogystal â bod yn gyfrwng i helpu’r Brifysgol osod ei bolisi a strategaeth.

Sut gallaf i fod yn gynrychiolydd cwrs? Ydi hi’n rhy hwyr?

Mae’r cynrychiolwyr cwrs fel arfer yn cael eu hethol gan eu cwrs o fewn yr ychydig wythnosau cyntaf yn Semester 1 – cysylltwch â’ch ysgol i ganfod pryd mae hyn yn digwydd ac os ydyw wedi digwydd eto. Unwaith yr ydych wedi cael eich ethol gan eich cyfoedion fe fyddwch yn gynrychiolydd cwrs! Mae mor hawdd â hynny a dydy hi byth yn rhy hwyr i gymryd rhan o fewn eich ysgol – felly cysylltwch â nhw.

Sut gallaf i ganfod mwy am fod yn gynrychiolydd cwrs?

I ganfod mwy am fod yn gynrychiolydd cwrs naill ai cysylltwch â’r ysgol neu anfonwch e-bost at: coursereps@undeb.bangor.ac.uk